વાંચે ગુજરાત. આ કહેવું સહેલું છે, પણ અમલમાં મૂકવું મુશ્કેલ છે કેમ કે વાંચવા માટે, વાંચવું ગમે એવું પુસ્તક હાથવગું પણ હોવું જરૂરી છે. કદાચ એટલે જ ગુજરાત સરકારે સૂત્ર ઉપરાંત એનો અમલ થાય એવા વિવિધ કાર્યક્રમો પણ અમલમાં મૂકવા પડ્યા. ખેર, આપણું કનેક્શન તો સાયબરજગત સાથે છે એટલે આપણે વાત કરીએ ઇન્ટરનેટ પરના રીડિંગની.
પહેલો સવાલ, ઇન્ટરનેટ પર સામાન્ય રીતે તમે શું શું જુઓ છો? બીજો સવાલ, તમે જે કંઈ જુઓ છો એ વિશે શું અનુભવો છો? મોટા ભાગે પહેલા સવાલનો જવાબ એવો હશે કે ‘જોઈએ છીએ તો ઘણું બધું, જોતાંવાંચતાં ટાઇમ ખૂટે એટલું’ અને બીજા સવાલનો જવાબ એવો હશે કે ‘આ વાંચવા જેવું તો લાગે છે પણ અત્યારે ટાઇમ નથી, ફરી ક્યારેક’. આ મોટા ભાગના લોકોનો અનુભવ હશે. ‘ફરી ક્યારેક’વાળો સમય લગભગ તો આવતો જ નથી, અને આવે તો પેલી સાઇટ ને પાનું કયું હતું એ ભૂલાઈ ગયું હોય. આ કારણસર ઇન્ટનેટ પર મોટા ભાગે આપણે સૌ બધું જોઈએ જ છીએ, વાંચતા નથી. કમ્પ્યૂટરના સ્ક્રીન પર વાંચવું ફાવતું નથી એ એક મુદ્દો પણ ખરો, પણ ઘણું ખરું તો, જે તે સમયે લાંબું વાંચવા માટે જોઈતા સમયનો અભાવ એ જ મુખ્ય કારણ હોય છે.
વાસ્તવમાં, ઇન્ટરનેટ પર ખરેખર સમય કાઢીને વાંચવા જેવું પણ ઘણું બધું હોય છે. તો આનો ઉપાય શું કરવો? એક રસ્તો છે ગૂગલ રીડર જેવી આરએસએસ રીડર સર્વિસનો ઉપયોગ કરવાનો. જેની મદદથી, તમે તમને ગમતી જુદી જુદી સાઇટ્સ કે બ્લોગ્સના આરએસએસ ફીડ મેળવો ને વખત મળે ત્યારે રીડરમાં જઈને લહેરથી વાંચો. પરંતુ આમાં થાય છે કે એવું કે તમને શું વાંચવું ગમે છે એ તમારે પહેલેથી નક્કી કરી લેવું પડે છે. પછી, એ સાઇટ કે બ્લોગના સર્જક વીરેન્દ્ર સહેવાગ જેવા હોય તો તમારા રીડરમાં આર્ટિકલ્સનો ગંજ ખડકાતો રહે. ફરી સવાલ એ જ સમયનો આવીને ઊભો રહે એ ઢગલામાંથી ગમતું તારવી રહો ત્યાં તો ખાસ તારવેલો સમય જ પૂરો થઈ જાય.
ઉપરાંત, જેમ વાસ્તવિક સફરમાં બને છે એમ, સફરની ખરી મજા મંઝિલ પહેલેથી નક્કી કરી લેવામાં નથી. અહીં તો તમે મોજથી જુદી જુદી ટેબ્સના સહારે તરતા હો ત્યારે કોણ જાણે કેટલુંય અવનવું સામે આવે, એ બધું કંઈ આરએસએસ ફીડમાં નાખવા જેવું ન હોય. તમને ફક્ત એ એક, જે તે આર્ટિકલ પૂરતો એ વેબસાઇટમાં રસ હોય, પણ પૂરતો સમય ન હોય તો?
એ માટેનો એક ઉપાય છે રીડઇટલેટર (http://readitlaterlist.com/) જેવી સર્વિસનો. એક રીતે, અલગ અલગ બ્રાઉઝર માટેનાં એક્સટેન્શન જેવી જ આ સર્વિસ છે. આ સાઇટ પર જઈને તમે, તમે જે બ્રાઉઝર વાપરતા હો તેના માટે એક નાનકડું એક્સટેન્શન ડાઉનલોડ કરીને ઇન્સ્ટોલ કરી લો. બ્રાઉઝર એક વાર રીસ્ટાર્ટ થશે અને પછી તમને એડ્રેસબારમાં એક પીળું, તીર જેવું નિશાન દેખાશે. હવે તમે કોઈ પણ સાઇટ પર હો અને આખું પાનું વાંચવા જેટલો સમય ન હોય ત્યારે ફક્ત એ તીર પર ક્લિક કરી દો. એ પાનું, તમારા રીડઇટલેટર લિસ્ટમાં સેવ થઈ જશે. તમારું આ રીડઇટલેટર લિસ્ટ એડ્રેસબારથી આગળ, છેક જમણા છેવાડે એક નવા બટનરૂપે આવી ગયું હશે. સમય હોય ત્યારે તેના ડ્રોપ ડાઉન લિસ્ટમાં જઈને તમે જે તે આર્ટિકલ આરામથી વાંચી શકો છો. તમે ઇચ્છો તો કોઈ ફોર્મેટિંગ કે ડિઝાઇનના ક્લટર વિના માત્ર ટેક્સ્ટના સ્વરૂપમાં પણ વાંચી શકો છો.
જો તમે તમારા લિસ્ટને કોઈ પણ કમ્પ્યૂટર કે મોબાઇલ કે બીજા બ્રાઉઝર વગેરેમાં પણ એક્સેસ કરવા માગતા હો તો આ સર્વિસમાં તમારું એક એકાઉન્ટ ખોલાવી લો. તમે ગૂગલના રીડરનો ઉપયોગ કરતા હો તો રીડઇટલેટરના તીરને ગૂગલ રીડરમાં પણ સમાવી શકો છો.
હવે કદાચ એવો સવાલ થાય કે વાત આટલી જ હોય તો ગૂગલ ટૂલબાર કે જે તે બ્રાઉઝરની બુકમાર્ક સર્વિસનો ઉપયોગ ક્યાં નથી થઈ શકતો? વધુ એક એકાઉન્ટ અને પાસવર્ડની જફા કેમ ઊભી કરવી? તેનો જવાબ એ કે રીડઇટલેટરમાંના બધા આર્ટિકલને તમે ડાઉનલોડ પણ કરી રાખી શકો છો. પછી ઇચ્છો ત્યારે વાંચો, નેટ કનેક્શન ન હોય તો પણ.
આ સર્વિસના બીજા પણ ઘણા ફાયદા છે. જેમ જેમ ઉપયોગ વધારશો તેમ તેમ સમજાશે. મૂળ મુદ્દાની વાત એટલી કે આ સર્વિસ વાપરો કે ન વાપરો, સમય કાઢીને ઇન્ટરનેટ પર જોવા ઉપરાંત, વાંચજો ખરા.
Share with friends
| Comments |
|
